डडेल्धुरा : जिल्ला प्रहरी कार्यालय डडेल्धुराको अगुवाइमा जिल्लाको मुख्य बजार क्षेत्रहरूमा बिहीबारदेखि पहिलोपटक जेब्रा क्रसिङ निर्माण कार्य सुरु गरिएको छ।
ट्राफिक व्यवस्थापनलाई सहज बनाउने र पैदलयात्रुहरूको सुरक्षामा टेवा पुर्याउने उद्देश्यसहित प्रारम्भिक चरणमा बागबजार, बसपार्क, तुफानडाँडा र कीर्तिपुर क्षेत्रमा जेब्रा क्रसिङ बनाइएको हो।
डडेल्धुराका प्रमुख प्रहरी नायब उपरीक्षक (डीएसपी) सुगन्ध श्रेष्ठका अनुसार सवारी चाप अत्यधिक हुने क्षेत्रहरूमा यस्ता संरचना आवश्यक भएकाले अभियान सुरु गरिएको हो।
‘डडेल्धुराको मुख्य बजार क्षेत्रहरूमा सवारीसाधन र पैदलयात्रुको चाप अत्यधिक रहेकोले ट्राफिक व्यवस्थापन सहज बनाउन र दुर्घटनाको जोखिम कम गर्न जेब्रा क्रसिङ निर्माण सुरु गरिएको हो,’ श्रेष्ठले भने, ‘बागबजार र बसपार्क क्षेत्रबाट सुरु गरिएको यो अभियान विस्तारै अन्य स्थानमा पनि फैलाइनेछ।’
उनका अनुसार जेब्रा क्रसिङ बनेका स्थानमा पैदलयात्रु र चालक दुवैको सुरक्षालाई ध्यानमा राख्दै जनचेतनामूलक सूचना बोर्डहरू समेत राखिएको छ।
