सुपको पहिलो, देशको सातौ स्थानमा जिल्ला प्रशासन कार्यालय डडेल्धुरा

डडेल्धुरा ।कार्य सम्पादनमा जिल्ला प्रशासन कार्यालय डडेल्धुरा सुदूरपश्चिम प्रदेशमा पहिलो भएको छ । कार्यालयले सम्पादन गर्ने कामका आधारमा गरिने मूल्यांकनमा जिल्ला प्रशासन कार्यालय डडेल्धुरा पहिलो भएको हो । नौ वटा जिल्ला रहेको सुदूरपश्चिमा समयमै र दुरुस्त काम गर्ने प्रशासन कार्यालयको रुपमा जिल्ला प्रशासन कार्यालय डडेल्धुरा स्थापित भएको छ ।

देशभरका ७७ जिल्लाहरु मध्ये जिल्ला प्रशासन कार्यालय डडेल्धुरा सातौँ स्थानमा परेको छ । गत आर्थिक वर्षमा पाँचौ स्थानमा रहेको जिल्ला प्रशासन कार्यालय यस वर्ष भने सातौँ स्थानमा परेको हो । प्रदेशमा पहिलो स्थानमै रहेपनि देशभरमा दुई स्थान तल झरेको कार्यालयका नायव सुब्बा चन्द्र रोकायाले बताए ।

जिल्ला प्रशासन कार्यालय डडेल्धुराले बुधबार देखि राहदानी पासपोर्टको अनलाईन फाराम कार्यालयमै निःशुल्क भर्न सुरुवात गरिएको उनले जानकारी दिए । केही दिन अधि मात्रै कार्यालयमा नयाँ आएका प्रमुख जिल्ला अधिकारी अञ्जन न्यौपानेले यस बिषयमा छलफल चलाएपछि कार्यालयमै अनलाईन फाराम भर्ने कामको सुरुवात भएको उनले बताए ।

यस अघि पासपोर्ट बनाउन बजारमा खोलिएका अनलाईन फाराम पसलहरुबाट फाराम भर्नु पर्ने बाध्यता स्थानीयको थियो । फाराम भर्ने पसलहरुले तीन सय देखी पाँच सय रुपियाँ सम्म शुल्क लिने गरेका थिए । अब भने प्रशासन कार्यालयमै अनलाईन फाराम भरिने उनले बताए ।
पासपोर्टका लागि कार्यालयमै निःशुल्क अनलाईन फाराम भरिने जानकारी उनले दिए । यो सेवा सुचारु गरे संगै बुधबार चार वटा फाराम भरि राहादानीका लागि सिफारिस गरिएको उनले बताए ।