डडेल्धुरा ,नेपाली कांग्रेस केन्द्रिय सभापति तथा प्रधानमन्त्री शेरबहादुर देउवाको गृह जिल्ला डडेल्धुरामा पार्टी भित्र किचलो रहेको छ । नेपाली कांग्रेसको सातौं जिल्ला अधिवेशनमा देखिएको विवादको असर आसन्न स्थानीय तहको निर्वाचनमा समेत देखिन थालेको छ ।
डडेल्धुरामा सत्ता गठबन्धनले मित्रवत् प्रतिस्पर्धाका साथ चुनावी मैदानमा होमिने सहमति गरेपछि दलबीचको प्रतिस्पर्र्धा रोचक हुने अनुमान गरिएको छ । राजनीतिक दलको छुट्टा–छुट्टै उम्मेदवारी घोषणा मात्र होइन् । काँग्रेसभित्र देखिएको विवादले झन् यहाँको निर्वाचन रोचक हुने देखिएको छ । छैटौ जिल्ला अबिधेशनका सभापति तथा सुदुरपश्चिम प्रदेश सांसद कर्ण मल्ल समुहले विपि कांग्रेसबाट जिल्लाका ५२ वटै वडा र सात वटा पालिकामा उमेदवारी दिने तयारी गर्नु भएको छ । कांग्रेसको आन्तरिक किचलोका कारण सात वटा स्थानीय तह रहेको डडेल्धुरामा २०७४ कोे भन्दा कमजोर परिणाम आउने अनुमान गरिएको छ ।
२०७४ मा काँग्रेसले ४ पालिका प्रमुख जितेको थियो । तर, यसपटक काँग्रेसलाई त्यो पनि जोगाउन हम्मेहम्मे परेको छ । एकलौट रूपमा देउवाले जिल्ला अधिवेशन गरेका कारण देउवासँग रूष्ट मल्लले समुहले ‘नेपाली काँग्रेस वीपी’ बाट जिल्लाका ५२ वटै वडामा चुनाव लड्ने तयारी पुरा गरि सकेको छ । अन्तिम समयसम्म देउवाको निर्णय पर्खिने, न्यायपुर्ण निर्णय नभए आफ्नो समुह चुनावमा होमिने मल्ल समुहको भनाई छ । नेपाली कांग्रेसमा नेता हरि प्रसाद भट्ट करुवा चिन्ह लिएर चुनावमा जाने बताउनुहुन्छ । हरहर हरी, घरघर हरी नारा लिएर भट्ट एक महिना अगाडी देखी अमरगढी नगरपालिकाका वस्तिवस्ती पुग्नु भएको छ । पार्टीले अन्याय गरेको बताउदै जनताबाट न्याय पाउने उहाँको भनाई छ । अमरगढी नगरपालिकाको मेयरमा उमेदवार रहेका भट्ट कुनैपनि हालतमा पछी नहट्ने बताउनुहुन्छ ।
२०७४ मा एमालले दुई र माओवादी केन्द्रले एक स्थानीय तहको प्रमुखमा जितेको थियो । एमाले फुटेर दुई भागमा विभाजन भइसकेको छ । जिल्लाका शिर्षस्त नेताले एमाले छोडेपछि यहाँका पालिकामा एमालेका उम्मेदवार पाउनै समस्या छ । तर, एमालले वीपी काँग्रेससँग गठबन्धन गरेर साख जोगाउन प्रयत्न गरिरहेको छ । जिल्लाको गृह नगर अमरगढी नगरपालिकामा नेकपा एमाले र विपि काग्रेस बिच तालमेल गर्नका लागी दुई चरणमा वार्ता भएपनि वार्ताबाट निस्कर्ष आउन सकेन । एमाले कमजोर रहेको बताउदै विपि काग्रेसले अमरगढी नगरपालिकामा तालमेल नगरकोे विपि काग्रेस स्रोतले जानकारी दिएको छ । नेकपा एकालेका नेता तथा अमरगढी नगरपालिकाका नगर प्रमुख विशेश्वर प्रसाद ओझाका अनुसार एमालेले प्रमुख पद पाए मात्रै विपि काग्रेससंग तालमेल हुने बताउनुभयो । हामीले २०७४ मा नै पालिका प्रमुख उपप्रमुख सहित बहुमत वडा जितेका हौ, एमाले एक्लै चुनाव लड्छ, ओझाले भन्नुभयो ।
काँग्रेस फुट हुनुको फाइदा माओवादी र समाजवादीलाई छ । नेकपा माओवादी केन्द्र प्रदेश कमिटी उपाध्यक्ष मान सिंह मालले काग्रेसको अस्पष्ट निर्णयलाई नपर्खिने बताउनुभयो । कांग्रेस आफु नमिल्ने माओवादीलाई अल्झ्याउने काम मात्रै गर्ने भएकाले हामी एकल रुपमा चुनावमा जाने तयारीमा छौ, मालले भन्नुभयोे, आवश्यकता अनुसार केही ठाँउमा गठबन्धन हुन सक्छ तर कांग्रेसको विश्वास घट्दै गएको छ ।
नेकपा एकिकृत समाजवादी नवदुर्गा गाउँपालिकामा एकल रुपमा चुनाव आफ्नो हात पार्ने दाउमा छ । ठुला दलले गठबन्धनको निहुँमा भागवण्डामा किचलो गर्न थालेपछि समाजवादी एकल रुपमा चुनावका लागी अभ्यास गरि रहेको छ । काग्रेस र माओवादीले स्पष्ट खाका दिन नसकेपछि आफुहरुले सात वटै पालिका र वडाहरुमा उमेदवारको टुंगोमा नपुगेको नेकपा एकिकृत समाजवादी पार्टीका केन्द्रिय सदस्य तथा जिल्ला ईन्चार्ज नर बहादुर बिष्टले बताउनुभयो । हामी केन्द्रिय कमिटीले गरेको निर्णयको आधारमा पाच दलिय गठबन्धनको कोर्षमा छौ, बिष्टले भन्नुभयोे, मित्रवत प्रतिस्पर्धामा नै गएपनि हामी दुई पालिका जित्छौ ।
गठबन्धन बाहिर रहेर काग्रेस एक्लै चुनावमा गए दुई तह मात्रै जित हात पार्ने आकलन गरिएको छ । काग्रेसले ५र माओवादीले ३ पालिकाको दावी राख्नु गठबन्धनको प्रमुख समस्या रहेको छ ।