डडेल्धुरा: डडेल्धुराका पत्रकार वरुण पनेरुले तीन विद्यालयमा छात्रवृत्ति कोष स्थापना गरेका छन्।
आफ्ना पुर्खाहरू एवं बुवाले अध्ययन, अध्यापन गरेका तीन सामुदायिक विद्यालयमा उनले छात्रवृत्ति कोष स्थापना गरेका हुन्।
सामुदायिक विद्यालयमा अध्ययनरत निम्न वर्गका जेहेन्दार विद्यार्थीलाई पोशाक, कापी, कलम खरिद गर्न छात्रवृत्ति कोष स्थापना गरेको पत्रकार पनेरुले बताए।
आफ्नो आम्दानीको १० प्रतिशत रकम छुट्याएर छात्रवृत्ति कोष स्थापना गरेको उनले जानकारी दिए।
पनेरुले भागेश्वर गाउँपालिका–२ रुपालमा रहेको असिग्राम मावि र भागेश्वर गाउँपालिका–३ बोगटाको सरस्वती नमूना माविमा २५-२५ हजार रुपैयाँको छात्रवृत्ति कोष स्थापना गरेका हुन्। यी दुई विद्यालयमा उनका हजरबुजा र बुवाले अध्ययन गरेका थिए।
पत्रकार पनेरुले आफू पढेको र बुवाले अध्यापन गरेको परशुराम नगरपालिका–६ को शिद्धनाथ माविमा एक लाख रुपैयाँ बराबरको छात्रवृत्ति कोष स्थापना गर्ने उनले बताए।
शिद्धनाथ माविको आइतबार हुने स्वर्ण जयन्ती तथा अभिभावक दिवसका अवसरमा हाल ५० हजार रुपैयाँको छात्रवृत्ति कोष स्थापना गर्न लागेको उनले बताए।
बुवा कृष्णप्रसाद पनेरुका नामबाट स्व. कृष्णप्रसाद अध्ययन छात्रवृत्ति कोष स्थापना गर्ने उनको तयारी छ।
उनका बुवाको शिद्धनाथ माविको प्रधानाध्यापक रहेका बेला विद्यालयको कामको सिलसिलामा सदरमुकाम जाने क्रममा ०५३ मंसिर ९ गते सडक दुर्घटनामा परी मृत्यु भएको थियो।
नेपाल पत्रकार महासघ सुदूरपश्चिम प्रदेश समितिका कोषाध्यक्षसमेत रहेका पत्रकार पनेरु डडेल्धुरा जेसिज वर्ष २०२० का अध्यक्षसमेत रहिसकेका छन्।
